Rreth 300 metra nën shkretëtirën Chihuahua në Meksikë, gjatë kërkimit të mineraleve të plumbit dhe argjendit në vitet 2007 dhe 2008, rastësisht u zbulua shpella mahnitëse me kristale gjigante.
Kjo shpellë përmban kristale gjigante seleniti (gipsium, CaSO4 • 2 H2O), që janë ndër kristalet më të mëdha natyrore të gjetura ndonjëherë. Kristali më i madh (në formë të obeliskut) është i gjatë 12 metra (me diametër prej 4 metrash) dhe peshon 55 ton.
Kristalet gjigante janë formuar nga ujërat nëntokësore të ngopura me sulfat kalciumi, i cili për qindra mijëra vjet është filtruar përmes sistemit të shpellës.
Kur para rreth 500.000 vjetëve, magma e cila gjendet rreth 1.5 kilometra nën shpellë kishte filluar të ftohet, këto minerale kishin filluar të ndahen nga uji.
Kristalet që ngjasojnë me akullnaja gjigante, krijojnë ndjenjën sikur brenda shpellës është shumë ftohtë. Mirëpo, kjo është larg nga realiteti, meqë temperatura në shpellë arrin deri në 58 °C, ndërsa lagështia e ajrit sillet prej 90 deri në 99 për qind.
Vizitorët e shpellës duhet të jenë të pajisur me pajisje mbrojtëse, të cilat përmbajnë copa akulli për ftohje.
Shpella aktualisht është e mbrojtur me dyer të rënda prej çeliku, në mënyrë që kjo mrekulli natyrore të ruhet edhe për brezat e ardhshëm. /NGJYRA.COM/
